Dularfullt mál skekur Osló þessa dagana. Á síðustu tveimur vikum hafa sjö dauðar dúfur fundist á götum borgarinnar. Það er ekki frásögur færandi eitt og sér en það sem gerir málið sérstakt er að allar voru dúfurnar höfuðlausar. Grunur leikur á að dýraníðingur eða dýraníðingar hafi verið að verki.

Norska ríkisútvarpið, NRK, skýrir frá þessu. Fram kemur að engir aðrir áverkar hafi verið á dúfunum og að höfuð þeirra hafi ekki fundist.

Svein-Håkon Lorentsen, hjá norsku náttúrufræðistofnuninni, sagði í samtali við NRK að það sé undarlegt að ekki hafi verið reynt að borða dúfurnar og að þær séu svo heillegar, aðeins vanti höfuð þeirra. Í flestum tilfellum hljóti dúfur áverka á líkamanum og missi fjaðrir þegar ránfuglar eða rándýr ráðast á þær. Aðrir sérfræðingar tóku í sama streng og sögðu mjög undarlegt að engir aðrir áverkar séu á fuglunum. Þeir vildu þó ekki útiloka að ránfugl eða rándýr gæti hafa banað þeim.