Á meðan Íslendingar búa við við talsvert miklar takmarkanir í sínu lífi er lífið öðruvísi í Danmörku. Þetta sést best þegar horft er yfir knattspyrnuleikvanga.

Íslenska landsliðið mætti Rúmeníu í gær á Laugardalsvelli og voru um 2200 áhorfendur á vellinum. Uppselt var á völlinn sem tekur 10 þúsund einstaklinga í sæti. Á knattspyrnuleikjum á Íslandi skulu vera 200 manna sóttvarnarhólf.

Ísland er eitt af fáum löndum í Evrópu sem hefur þessar takmarkanir á leikjum utandyra. Á miðvikudag var stútfullur völlur á Parken í Kaupmannahöfn. Þar unnu Danir góðan sigur á Skotlandi.

Í gær greindust 700 einstaklingar með COVID-19 veiruna í Danmörku, á sama tíma voru smitin á Íslandi 54. Um alla Evrópu í gær mátti sjá fulla leikvanga af fólki sem naut þess að horfa á knattspyrnu.

Á sama tíma í Laugardalnum myndaðist nánast enginn stemming og vængbrotið íslenskt landslið tapaði gegn slöku rúmensku liði á heimavelli.