Aron Einar Gunnarsson fyrirliði íslenska landsliðsins situr í einangrun á Spáni með COVID-19 og getur ekki tekið þátt í verkefni íslenska landsliðsins í næstu viku.
Þrír leikir eru framundan í undankeppni HM 2022 en ljóst er að fjarvera Arons er blóðtaka, ofan á það er Gylfi Þór Sigurðsson fjarverandi vegna málefna hans í Bretlandi.
Aron Einar greindist með COVID-19 í æfingaferð Al-Arabi á Spáni og er þar fastur í einangrun vegna veirunnar.
„Því miður er Aron ekki leikhæfur. Við biðum fram á síðustu stundu. Við vorum þangað til seint í gærkvöldi í sambandi við Aron. Hann er á undirbúningstímabili og svo veikist hann. Hann er búinn að vera í einangrun í yfir viku. Það er ómögulegt að ná honum leikhæfum fyrir þetta,“ sagði Arnar Þór.
Rúnar Alex Rúnarsson hefur jafnað sig af COVID-19 veikindum en hann er kominn lengra í bataferli sínu en Aron Einar.
„Við tókum þá ákvörðun í sameiningu við Aron að vera ekki að ýta á eftir því. Það eru orðnar ákveðnar reglur hjá ákveðnum félögum að leikmenn gangi í gegnum mjög nákvæma læknisskoðun eftir Covid, ómskoðun, hjartalínurit og fleira. Rúnar Alex er búinn að ganga í gegnum þetta og er byrjaður að æfa. Aron á þetta allt eftir. Það var ómögulegt að ná honum leikhæfum.“
