Harry Kane mætti aftur til æfinga hjá Tottenham í morgun eftir langt frí í kjölfar EM 2020. Tottenham átti von á honum á mánudeginum síðastliðnum en hann mætti ekki. Harry Kane sagði á dögunum að hann hafi aldrei neitað að mæta á æfingar en samkvæmt heimildum hefur hann þegar náð samkomulagi um persónuleg kjör við Manchester City.

Nuno Espirito Santo, þjálfari Tottenham, segist ekki hafa rætt við Kane en að hann ætli að tala við hann fljótlega til að fara yfir stöðuna.

Kane ýjaði að því að hann langaði að fara frá Spurs til að vinna stærstu titlana sem í boði eru en Tottenham endaði í 7. sæti í fyrra og leikur í Sambandsdeild Evrópu á næsta tímabili.

Daniel Levy, stjórnarformaður Tottenham, gaf hins vegar til kynna í maí að hann ætlaði að bera hag félagsins fyrir brjósti og að það yrði erfitt að selja Kane sem á þrjú ár eftir af samningi sínum við Tottenham.