Bankastræti Club, eða skemmtistaðurinn B5 eftir yfirhalningu Birgittu Lífar Björnsdóttur opnar með pompi og prakt annað kvöld en í kvöld er þar húsfylli af áhrifavöldum og félagsfiðrildum á eins konar forsýningu eða generalprufu. Mikið er þar um dýrðir, stjörnuljós, búbblur og að sjálfsögðu LXS-dívurnar, hópur áhrifavalda sem fékk sér vinahúðflúr með stöfunum LXS um daginn.
Segja má að kjólar frá Hildi Yeoman séu þar áberandi í kvöld en að sjálfsögðu eru helstu karlmennirnir úr samkvæmislífinu einnig á svæðinu og klæddir eins og þeir séu á frumsýningu í Hollywood. Glamúr, kampavín og gleði alla leið.
Greinilega þurfti vel að hita upp fyrir for-opnunina og má á Instagram sjá væntanlega gesti gíra sig upp í gleðina með því að drekka bjóra með svokallaðri „shot-gun“ aðferð auk þess sem gamla góða trektin með slöngunni var einnig brúkuð.
Fókus tók saman það helsta það sem af er kvöldi því við vitum að þú getur hreinlega ekki beðið eftir að mæta á Bankastræti Club þegar dyrnar opnast á morgun fyrir pöpul landsins.
