Fjölnir í Lengjudeild karla útilokar ekki að sannfæra einn besta knattspyrnumann allra tíma um að koma til Íslands. Lionel Messi vaknaði í morgun í Brasilíu og er í fyrsta skipti atvinnulaus frá því að hann var 13 ára gamall. Samningur hans við Barcelona var á enda á miðnætti.
Messi var launahæsti knattspyrnumaður í heimi á gamla samningi sínum og eftir skatt fékk hann 85 milljónir króna inn á bankareikning sinn í hverri viku.
Messi hafði skrifað undir þennan samning í nóvember árið 2017 en viðræður við Barcelona um nýjan samning eru enn í gangi.
Á Twitter er skorað á Fjölni að rífa upp veskið og semja við Messi. „Jæja þá er Lionel Messi ekki lengur með samning hjá Barcelona, Fjölnir sign him up right now!,“ skrifar Bjarki Fannar á Twitter.
Forráðamenn Fjölnis voru fljótir til svars og útiloka ekkert. „Við skoðum málið,“ svarar Twitter síða Fjölnis í léttum tón.
Messi gekk í raðir Barcelona þegar hann var 13 ára gamall og í fyrsta skiptið í 7478 daga er hann ekki lengur samningsbundinn félaginu.
„Við viljum halda Lionel Messi og Leo vill vera áfram. Allt er enn á réttri leið, það eru vandræði vegna regluverks um fjármál. Við erum að reyna að finna bestu lausnina fyrir báða aðila,“ sagði Joan Laporta forseti Barcelona en félagið er skuldum vafið.
Við skoðum málið! #FélagiðOkkar https://t.co/7KdBEWC08r
— Fjölnir FC (@Fjolnir_FC) July 1, 2021
