Ungverjaland og Portúgal mættust í fyrsta leik F-riðils á Evrópumótinu í knattspyrnu. Leiknum lauk með 0-3 sigri Portúgal. Cristiano Ronaldo komst í sögubækurnar er hann leiddi lið sitt inn á völlinn en hann varð fyrsti leikmaðurinn í sögunni til þess að spila á fimm Evrópumótum.
Portúgalar voru sterkari í fyrri hálfleik en náðu lítið að skapa sér fram á við og skorti léttleika í sóknarleikinn en vörn Ungverja var sterk fyrir.
Seinni hálfleikur spilaðist á svipaðan hátt en það dró til tíðinda á 80. mínútu þegar Schon kom boltanum í netið en hann var rangstæður og VAR dæmdi markið af. Við þetta virtust Portúgalar vakna til lífsins og náði Guerreiro að brjóta ísinn á 84. mínútu leiksins.
Aðeins tveimur mínútum síðar fengu Portúgalar víti sem Cristiano Ronaldo skoraði örugglega úr. Hann bætti svo við öðru marki í uppbótartíma og gulltryggði sigur Portúgal.
Portúgal fer því á topp F-riðils með þrjú stig.
Ungverjaland 0 – 3 Portúgal
0-1 Guerreiro (´84)
0-2 Ronaldo (´87)
0-3 Ronaldo (90+2)