Íslenska landsliðið gerði jafntefli við það pólska í vináttulandsleik ytra í dag. Frammistaðan hjá liðinu var góð.

Albert Guðmundsson kom Íslendingum yfir á 24. mínútu leiksins með góðri hælspyrnu af stuttu færi. Guðmundur Þórarinsson hafði tekið hornspyrnu sem rataði á Aron Einar Gunnarsson, hann skaut í átt að marki þar sem Albert var og kom boltanum í netið.

Pietr Zielenski jafnaði fyrir heimamenn tíu mínútum síðar. Staðan í hálfleik var 1-1.

Brynjar Ingi Bjarnason kom Íslandi aftur yfir í upphafi seinni hálfleiks með frábæru marki eftir fyrirgjöf Guðmundar.

Íslenska liðið hélt Pólverjum nokkuð vel í skefjum lengst af en heimamenn sóttu í sig veðrið í lok leiks. Það endaði svo með því að Karol Swiderski jafnaði fyrir þá á 88. mínútu. Lokatölur 2-2.

Plúsar og mínusar úr leiknum eru hér fyrir neðan.

Plús

Samstaðan og liðsheildin sem íslenska landsliðið er þekkt fyrir var sannarlega til staðar í leiknum.

Brynjar Ingi Bjarnason kórónaði góðan landsleikjaglugga með marki. Hann gerir svo sannarlega tilkall sem framtíðar miðvörður í landsliðinu.

Stöðugleikinn sem Aron Einar Gunnarsson, fyrirliði, hefur sýnt í þessum landsleikjaglugga er virkilega jákvæður.

Guðmundur Þórarinsson nýtti langþráðan séns með landsliðinu með mjög góðri frammistöðu. 

Ögmundur Kristinsson fylgdi eftir góðum leik í Færeyjum með öflugri frammistöðu í dag. Það er ekki oft sem markmenn nýta tækifærið í fjarveru Hannesar Þór Halldórssonar

Albert Guðmundsson skoraði gott mark. Það er mjög mikilvægt upp á framtíðina að fá hann í gang með landsliðinu.

Margir leikmenn nýttu landsleikjagluggann vel og gefa þjálfarateyminu hausverk fyrir þann næsta.

Mínus

Að halda ekki út í leiknum. Þó svo að úrslitin hafi ekki skipt öllu þá hefði verið virkilega sterkt fyrir Arnar Þór og Eið Smára að vinna Pólland í dag. Það var þó mjög margt jákvætt við frammistöðuna.