Nicolae Stanciu, leikmaður rúmenska landsliðsins, neitaði að krjúpa á hné í vináttulandsleiknum við England í gær. Hann tók þessa ákvörðun til þess að styðja við liðsfélaga sinn í Slavia Prague, Ondrej Kudela, sem var dæmdur í 10 leikja bann fyrir rasísk ummæli.

UEFA dæmdi Ondrej Kudela, leikmann Slavia Prague, í 10 leikja bann eftir seinni leikinn í 16-liða úrslitum Evrópudeildarinnar gegn Rangers. Opinber rannsókn UEFA fann hann sekan um rasísk ummæli og getur hann því ekki tekið þátt á EM í sumar.

Félagi hans í Slavia Prague og leikmaður rúmenska landsliðsins, Nicolae Stanciu, sagðist hafa sleppt því að krjúpa á hné til að styðja vin sinn sem hafi farið í bann án nokkurra sönnunargagna.

„Ég gerði það sama með Slavia þegar við spiluðum gegn Arsenal í 8-liða úrslitum,“ sagði Stanciu við Daily Record.

„Ég ákvað að gera þetta fyrir félaga minn sem var dæmdur í 10 leikja bann án nokkurra sönnunargagna.“

Ionuț Nedelcearu, leikmaður AEK, neitaði einnig að krjúpa á hné. Allir aðrir leikmenn á vellinum tóku þátt.