
Jordan Henderson spilaði sinn fyrsta leik síðan í febrúar í dag þegar England tók á móti Rúmeníu í vináttulandsleik. Dominic Calvert-Lewin fékk vítaspyrnu í leiknum en Henderson tók af honum boltann og tók spyrnuna sjálfur en hann lét verja frá sér.
Gareth Southgate viðurkenndi eftir sigurinn að Calvert-Lewin hefði átt að taka spyrnuna.
Henderson var gagnrýndur af sérfræðingum í sjónvarpinu en þeim fannst einnig furðulegt að Calvert-Lewin hefði ekki barist fyrir því að taka spyrnuna.
„Henderson hefur aldrei skorað fyrir England og vildi því taka spyrnuna. Ef ég væri Calvert-Lewin þá væri ég ansi vonsvikinn,“ sagði Ian Wright hjá ITV.
Þá bætti Roy Keane við: „Calvert-Lewin hefði átt að berjast fyrir þessu, þetta leit ekki vel út fyrir hann.“