Stefán John Stefánsson, verkefnastjóri Hugarfars, fer ekki fögrum orðum um tryggingafélagið Vörð en vinur Stefáns varð fyrir fordómum vegna kynhneigðar sinnar þegar hann heimsótti tryggingafélagið á dögunum.

„Í gær lenti kunningi minn í því að verða fyrir hrottalegum fordómum gagnvart kynhneigð sinni frá tryggingarfélagi þegar hann var að reyna að versla sér þjónustu. Ég var brjálaður,“ segir Stefán í myndbandi sem hann birti á bæði Facebook og Instagram-síður sínar í gær. Stefán gaf DV góðfúslegt leyfi til að birta myndbandið.

Tryggingarfélagið sem um ræðir er Vörður og segir Stefán vin sinn hafa verið spurðan af starfsmanni fyrirtækisins „hvor er karlinn og hvor er konan“ þegar vísað var til sambands tveggja karlmanna.

„Ekki nóg með það heldur býður starfsmaðurinn viðkomandi kjól, brúðkaupskjól, til þess að lána öðrum hvorum karlinum sem á að vera konan í samkynhneigða sambandinu. Er ekki í lagi?“ segir Stefán og bætir við að dagurinn sem þetta gerðist, 17. maí, er alþjóðlegur dagur gegn fordómum í garð hinsegin fólks.

Stefán mætti á skrifstofu Varðar til að ræða við starfsfólk tryggingafélagsins enda verulega reiður eftir þessa upplifun vinar síns. Þar ræddi hann við yfirmann.

Stefán tekur fram í myndbandinu að búið hafi verið að senda inn formlega kvörtun vegna starfsmannsins og að hann hafi viljað koma á skrifstofuna til að fá svör. Í myndbandinu heyrist ekki vel hvað starfsmaðurinn sem Stefán ræðir við er að segja. Í lok samtals þeirra heyrist þó í starfsmanninum segja að málið verði skoðað.

„Í kjölfar þessa fundar fékk ég símtal frá framkvæmdastjóra Varðar, hún var gjörsamlega miður sín, mjög einlæg og eiginlega svolítið bara „heartbroken“, enda ekki það sem þetta fyrirtæki stendur fyrir. Samt sem áður er þetta ekki eitthvað sem á að líðast árið 2021. Hvorki hér né nokkurs staðar annars staðar og ég vona að þau taki á þessu máli eins og það á að taka á þessu máli,“ segir Stefán í lok myndbandsins.

Myndbandið má sjá í heild sinni hér fyrir neðan.