Guðlaugur Þór segir að það sé mjög ánægjulegt að búið sé að staðfesta komu hans. „„Ég var fyrsti utanríkisráðherrann í mjög langan tíma sem var boðaður til Moskvu af Lavrov. Ég er búinn að funda með honum nokkuð oft og viðskipti milli landanna hafa verið að aukast. Við höfum átt mjög gott samstarf við þá hvað varðar norðurslóðir,“ hefur Fréttablaðið eftir Guðlaugi í umfjöllun um málið í dag.
Blaðið hefur eftir Guðlaugi að hann sé bjartsýnn á að Antony Blinken, utanríkisráðherra Bandaríkjanna, komi einnig til fundarins en engin opinber staðfesting hefur borist á því. „Við höfum lagt mikla áherslu á að allir muni mæta og erum vongóð um að það verði,“ sagði Guðlaugur.
Haft er eftir honum Íslendingar hafi fengið hrós fyrir hvernig haldið hafi verið á spöðunum í ráðinu á formennskutímanum við þær erfiðu aðstæður sem hafa verið uppi. Hann sagði að áhersla hafi verið lögð á að aðildarríkin einbeiti sér að málefnum norðurslóða í ráðinu og haldi öðrum spennumálum utan við ráðið. „Ef hins vegar það verður fullmannað á fundinum, sem við vonumst til, þá skyldu menn ekki vanmeta mikilvægi þess bara í stóra samhenginu,“ sagði Guðlaugur.
Aðspurður sagði hann að Ísland sé reiðubúið til að leggja sitt af mörkum til að bæta samskipti stórveldanna ef utanríkisráðherrar Bandaríkjanna og Rússlands mæta til fundarins.
