Í Cornwall-sýslu á suðvesturhorni Bretlands eru fallegar strendur sem laða til sín fjölda ferðamanna ár hvert. Það sem hefur fundist á ströndum sýslunnar seinustu daga hefur þó skilið íbúa eftir undrandi.
Á tveimur ströndum hefur undanfarið skolað á land dauðum selum sem hausinn hefur verið skorinn af. Einnig er búið að skera hreifana af sumum dýranna. Svipaðar sögur hafa borist frá löndum á borð við Frakkland og Írland.
Þó ekki sé staðfest hvernig dýrin drápust er sagt að það sé ekki óvenjulegt að hauslausum selum skoli á land en hræin gætu hafa velkst um í sjónum í marga daga áður en þau ber að landi. Þá er höfuð sela mjög þungt og hálsinn mjög viðkvæmur þannig að selirnir gætu hafa drepist af náttúrulegum aðstæðum og hausinn fallið af eftir á.
Það sem vekur þó mestan óhug er að hreifar selanna eru einnig horfnir en þeir ættu ekki að geta fallið af án aðstoðar. Þá eru rándýr ekki talin líkleg að éta einungis hreifa dýrsins og því mögulegt að ástand selanna sé af mannavöldum.