Niðurstöður loftslagsrannsókna eru mjög skýrar og segja okkur að við erum í stöðu sem krefst þess að við grípum til aðgerða ef við ætlum að koma í veg fyrir að loftslagið hlýni enn frekar.
Samhliða öllum þessum rannsóknum hafa verið dregnar upp sviðsmyndir af því hvernig heimurinn mun líta út ef við grípum ekki til aðgerða eða gerum ekki nóg. Kínverskir vísindamenn hafa nú reiknað út hvernig árstíðirnar á norðurhveli jarðar munu líta út um næstu aldamót ef við gefumst upp núna í baráttunni við loftslagsbreytingarnar. Niðurstöður rannsóknar þeirra hafa verið birtar í Geophysical Reserach Letters.
Samkvæmt niðurstöðum rannsóknarinnar þá er hugsanlegt að árið 2100 verði hægt að skilgreina helming ársins sem sumar hér á norðurhveli. The Guardian skýrir frá þessu. Fram kemur að vísindamennirnir hafi notað loftslagsgögn frá 1951 til 2011 sem grunn fyrir útreikninga sína. Þeir skilgreindu sumar sem tímabilið þar sem fjórðungur hæsta hita ársins varð og vetur sem tímabilið sem fjórðungur lægsta hitans varð.
Samkvæmt rannsókninni þá var sumarið á norðurhveli að meðaltali 78 dagar 1952 en var orðið 95 dagar að meðaltali 2011. Á sama tíma hafði veturinn styst úr 76 dögum niður í 73. Út frá þessum tölum reiknuðu þeir þróunina næstu áratugina út og niðurstöður þeirra sýna, miðað við að við gerum ekkert til að halda aftur af hnattrænni hlýnun, verði sumarið 166 dagar að meðaltali á norðurhvelinu árið 2100. Þetta styttir auðvitað aðrar árstíðir og veturinn verður aðeins 31 dagur. Mestu áhrif breytinganna verða við Miðjarðarhaf og í Tíbet.
