Streymisþjónustan Netflix er með rúmlega 200 milljónir skráðra notenda hjá sér en talið er að enn fleiri hafi aðgang að henni í gegnum vini eða fjölskyldumeðlimi, án þess að greiða fyrir þjónustuna.

Stjórnendur hjá Netflix hafa ákveðið að reyna að sporna gegn þessari þróun að fólk sé að deila aðgangi sínum til að aðrir þurfi ekki að greiða. Ef þú ætlar þér að nota aðgang sem annar á munt þú fá upp skilaboðin: „Ef þú býrð ekki með eigenda þessa aðgangs, þá þarftu þinn eigin aðgang til að halda áfram að horfa“

Þú kemst þó fram hjá þessari meldingu ef þú slærð inn kóðann sem eigandi aðgangsins fær sendan í tölvupósti eða SMS-i, eða með því að ýta á „Staðfesta seinna“. Á endanum þurfir þú þó að gefa upp kóðann eða búa til þinn eigin aðgang.

Þetta er í fyrsta sinn sem Netflix reynir að komast hjá því að fólk deili aðgangi en Reed Hastings, forstjóri Netflix, sagði í viðtali árið 2016 að deiling lykilorða sé eitthvað sem maður þurfi að læra að lifa með. Hann sagði það vera svo algengt að fólk deili leyniorði sínu með maka eða börnum svo ekki sé hægt að finna hvar draga eigi línuna.

Ekki er vitað hvenær þetta nýja kerfi á að byrja í notkun á Íslandi en það er að færast til fleiri og fleiri landa þessa dagana.