„Hann hefur í reynd ekki áhuga á neinu öðru en lífeyrissjóðs- og verðtryggingarmálum,“ skrifar Ingibjörg Ósk Birgisdóttir, en hún sat í stjórn VR á árinum 2010-2020. Vísar hún með orðum sínum til formanns VR, Ragnars Þórs Ingólfssonar, sem hún telur hafa lítinn áhuga á brýnum hagsmunamálum félagsmanna VR sem hafa orðið til þess að margir félagsmenn hafi róið á ný mið.
Hún skrifar þetta í pistli sem birtist hjá Vísi í dag.
Ingibjörg bendir á að Ragnar hafi fyrst vakið athygli sem álitsgjafi í kjölfar bankahrunsins 2008 og þótti þá sumum hann tala af viti. Hann hafi þó sýnt í verki sem formaður VR að hann hafi ekki áhuga á neinu öðru en lífeyris- og verðtryggingamálum.
Ragnar Þór hefur til dæmis nær ekkert gefið sig að starfs- og símenntunarmálum, sem eru þó mjög brýnt hagsmunamál launafólks og mun skipta sköpum á vinnumarkaði í ljósi tækninýjunga og síaukinnar sjálfvirknivæðingar.
„Hagsmunir almenns skrifstofufólks og háskólamenntaðra innan VR vekja ekki verulegan áhuga hjá formanninum af einhverjum ástæðum. Afleiðingar sinnuleysis í garð þessara hópa í formennskutíð Ragnars sjást best á því að sífellt fleiri skipta úr VR og fara í félög eins og Félag lykilmanna og stéttarfélög sem eru eingöngu fyrir háskólamenntað fólk. Við aukið brotthvarf tekjuhærri félagsmanna getur svigrúm VR til góðra verka minnkað verulega sem er áhyggjuefni.“
Ingibjörg sakar Ragnar um að hafa rýrt réttindi VR-inga stórlega með auglýsingaherferð um kulnun. Sem og kostnaðarsamri auglýsingaherferð um stuðningslán til heimilanna.
„Helsta verk Ragnars Þórs á sviði sjúkrasjóðs VR var að rýra réttindi VR-inga stórlega með fullkomlega ábyrgðarlausri auglýsingaherferð um kulnun, sem varð til þess að ásókn í sjóði stéttarfélaganna óx upp úr öllu valdi svo að stefnir í algjört óefni. Og nú stýrir Ragnar kostnaðarsamri auglýsingaherferð VR um stuðningslán til heimilanna, sem er dæmigert innihaldslaust og ófjármagnað loforð lýðskrumara í aðdraganda kosninga.“
Ragnar hafi áður, segir Ingibjörg, reynt fyrir sér á sviði stjórnmála þó með litlum árangri en telur Ingibjörg að Ragnar þrái hreinlega að komast á þing.
„Sá stjórnmálaflokkur sem formaður VR á helst samleið með er Sósíalistaflokkurinn – og hann er í sókn um þessar mundir samkvæmt skoðanakönnunum. Helsti áróðursmeistari þess flokks, Gunnar Smári Egilsson, fyrrverandi forstjóri, hefur gefið út að flokkurinn stefni að því að fá forystumenn úr samtökum launafólks efst á lista hjá sér í komandi alþingiskosningum. Þetta er tækifæri sem Ragnar Þór lætur varla framhjá sér fara. Hann þráir sæti á Alþingi, þó að hann fullyrði kannski annað í aðdraganda formannskosningar í VR.“
Tilgangur skrifa Ingibjargar er að benda á að félagsmönnum VR að kjósa heldur Helgu Guðrúnu Jónasdóttur sem formann.
„Í komandi formannskosningu í VR stendur valið því annars vegar um Ragnar Þór Ingólfsson, karl sem er kominn með hugann langt burt frá VR-ingum, og hins vegar Helgu Guðrúnu Jónasdóttur, konu sem hefur heitið því að vinna af heilindum í þágu allra félagsmanna í VR.“
