Í dag hafa sérfræðingar velt því fyrir sér hvort eldgos sé að fara að gjósa í Keili í dag. Almannavarnir héldu til að mynda fund í dag þar sem rætt var um möguleikann á eldgosi. Freysteinn Sigmundsson jarðeðlisfræðingur sagði á fundinum að gosið gæti hafist á næstu klukkustundum eða næstu dögum. Kvikan sé nálægt yfirborði og fylgjast þurfi vel með næstu klukkustundir. Það gæti líka dregist um nokkra daga að gos hefjist.

Ljóst er að íbúar á Reykjanesinu ætli að vera viðbúnir ef ske kynni að upp kemur eldgos. Blaðamaður DV fór á stúfana núna síðdegis og kíkti í nokkrar matvöruverslanir á svæðinu. Þar var örtröð af fólki enda vilja líklega allir á svæðinu vera búnir að kaupa helstu nauðsynjavörur ef eitthvað alvarlegt gerist. „Það er brjálað að gera í búðum hér fyrir sunnan,“ segir blaðamaðurinn sem en sá kíkti í tvær stærstu verslanirnar á svæðinu.

Víðir Reynisson, yfirlögregluþjónn hjá Almannavörnum, sagði þó á fund Almannavarna í dag að enginn verði í hættu vegna gossins sem yfirvofandi er. Fólk eigi að halda áfram með sitt líf og gosið muni ekki hafa mikil áhrif á líf fólks á næstunni. „Það sem gæti gerst er þessi gasmengun sem gæti haft áhrif á fólk með undirliggjandi sjúkdóma. Stærð og magn af gosefnum fer saman.“