Öllum sex verslunum Geysis hefur verið lokað og var öllu starfsfólki var sagt upp í gær á fundi þar sem aðili frá stéttafélaginu VR var einnig staddur, samkvæmt heimildum DV. Geysir rekur þrjár verslanir við Skólavörðustíg, eina í Kringlunni og aðra í Hafnarstræti á Akureyri. Fyrsta Geysis-verslunin var opnuð við Geysi í Haukadal árið 2008.

Fyrirtækið hagnaðist árið 2019 um 92 milljónir og velti sama ár 1,6 milljarði en það var 23% aukning milli ára samkvæmt frétt Fréttablaðsins. Verslanirnar eru ákaflega vinsælar meðal ferðamanna og selja bæði mörg þekktustu tískufatamerki heims í bland við eigin hönnun og heimilisbúnað svo sem ilmkerti og teppi. Síðasta ár hefur verið þungt í rekstri sökum Coronafaraldursins og má leiða að því líkur af samdráttur í ferðaiðnaðnum hafi höggið þungt í reksturinn.

Geysir er í eigu hjónanna Jóhanns Guðlaugssonar og Rakelar Þórhallsdóttur. Hjónin er einnig eigendur Hagavagnsins sem er einn vinsælasti hamborgarastaður miðborgarinnar og er einnig starfræktur á Geysi í Haukadal. Fyrirtæki í eigu hjónanna rekur sömuleiðis verslanir Lundans, Óðinn, Thor og Jólahúsið við Ingólfstorg en þeim var öllum lokað síðastliðið vor í kjölfar faraldursins.

Geysir hefur um árabil þótt ein glæsilegasta verslun landsins og hefur ítrekað hlotið verðlaun fyrir auglýsingaherferð ársins auk þess sem verslunin hefur verið verðlaunuð fyrir glæsilegar gluggaútstillingar og gefið út Geysis-blaðið.