Lionel Messi einn tekjuhæsti íþróttamaður allra tíma mun halda áfram að fá vel borgað til ársins 2025 frá Barcelona, sama hvort hann yfirgefi félagið eða ekki.
Samningur Messi við Börsunga er á enda í sumar og eru meiri líkur en minni á að hann yfirgefi félagið, Messi vildi ólmur losna frá Barcelona síðasta sumar en fékk það ekki í gegn.
Fari svo að Messi yfirgefi Barcelona næsta sumar þarf félagið samt sem áður að borga honum 69,4 milljónir punda í bónusa á næstu árum. Um þetta er kveðið í samningi hans sem skrifað var undir árið 2017. Um er að ræða rúma 12 milljarða íslenskra króna í bónusgreiðslu.
Barcelona þarf að borga Messi helming þessarar upphæðar næsta sumar eða 34,7 milljónir punda. Seinni helmingurinn skiptist svo í átta greiðslur.
Greiðslurnar átta eiga að berast Messi til ársins 2025 og má líkja því að Messi verði með 170 þúsund pund á viku hjá Barcelona allt til ársins 2025 eða 30 milljónir á viku.
Messi hefur verið jafn besti knattspyrnumaður í heimi um langt skeið en fjárhagserfiðleikar Barcelona eru miklir þessa stundina.