Breskir fjölmiðlar segja að stutt sé í að breska lyfjastofnunin veiti heimild til notkunar bóluefnis AstraZeneca og vísindamanna við Oxfordháskóla gegn kórónuveirunni. Jafnvel er talið að aðeins séu nokkrir dagar í það. Calum Semple, einn fremsti veirusérfræðingur Bretlands, segir að bóluefnið geti breytt stöðunni algjörlega.

Bretar hafa nú þegar bólusett 600.000 manns með bóluefninu frá Pfizer en margir binda miklar vonir við að bóluefnið frá AstraZeneca muni breyta gangi mála algjörlega. „Ástæðan er að Oxford-bóluefnið er miklu ódýrara og einfaldara í meðförum. Það þarf að geyma Pfizer-bóluefnið við 70 gráðu frost en Oxford-bóluefnið þarf bara að vera í ísskáp. Það einfaldar framkvæmd bólusetninga mikið,“ sagði Semple í samtali við BBC.

Bresk yfirvöld hafa pantað 100 milljónir skammta af bóluefninu en það dugir til að bólusetja alla þjóðina. ESB hefur pantað 400 milljónir skammta.

„Leyfi til notkunar Oxford-bóluefnisins mun breyta öllu. Bæði af því að það er ódýrara og auðveldara í meðförum en einnig vegna þess að þetta bóluefni hjálpar líkamanum við að mynda svokallaðar veiði/drápsfrumur sem geta gert út af við COVID-19 sýkingu. Þetta er frábært bóluefni,“ sagði Semple.

„Þeir sem verða bólusettir munu öðlast ónæmi á nokkrum vikum. Það er auðvitað mjög mikilvægt fyrir þá sem eru í áhættuhópum. Til að hjarðónæmi náist í samfélaginu þurfum við líklega að bólusetja 70 til 80% allra og það mun taka tíma. Ég giska á að við náum því marki í sumar,“ sagði hann einnig.