Heilbrigðisráðherra hefur í hyggju að setja löggjöf um þvingandi meðferð sjúklinga. Henni má aðeins beita í algerum undantekningartilvikum, meðalhófs verði gætt þegar ákvarðanir um beitingu þvingana verða teknar og eftirlit verður haft við beitingu slíkrar meðferðar. Grímur Atlason, framkvæmdastjóri Geðhjálpar, segir það vonbrigði að Embætti landlæknis styðji beitingu þvingana.

Fréttablaðið skýrir frá þessu í dag. Haft er eftir Grími að margir séu árum saman að jafna sig eftir að hafa verið beittir slíkum úrræðum.

Embætti landlæknis tekur undir tillögur heilbrigðisráðherra og segir að með löggjöfinni sé lögmæti beitingu þvingunaraðgerða tryggt.

„Aðbúnaður og staða mála býður ekki upp á mikið, það eru til dæmis engar lyfjalausar deildir í boði og hugmyndafræðin einsleit. Við höfnum því að þannig eigi það að vera til frambúðar. Það þarf ekki annað en að taka ákvörðun um að stefna í rétta átt,“ er haft eftir Grími sem segist skilja afstöðu stjórnvalda miðað við stöðu geðheilbrigðismála í dag. „Það er upp til hópa frábært starfsfólk sem starfar á geðdeildum landsins, en þetta er hlutur sem þarf að skilja eftir í fortíðinni,“ er einnig haft eftir honum.