Bóluefni sem vísindamenn við Oxford háskóla og hjá AstraZeneca lyfjafyrirtækinu eru að þróa hefur lengi verið talið ein besta vonin um að virkt bóluefni, gegn kórónuveirunni sem veldur COVID-19, komi á markað. Umfangsmiklar tilraunir standa yfir á bóluefninu og nú liggur fyrir að það vekur ónæmisviðbrögð hjá fullorðnum, bæði yngra og eldra fólki. Þetta vekur vonir um að í augsýn sé leið út úr því ömurlega ástandi sem heimsfaraldurinn hefur valdið.

The Guardian skýrir frá þessu. Fram kemur að bóluefnið valdi einnig litlum aukaverkunum hjá eldra fólki.

Bóluefni, sem virkar gegn veirunni, er talið munu breyta baráttunni gegn henni en hún hefur orðið 1,15 milljónum að bana fram að þessu og rústað efnahag margra landa auk þess sem líf milljarða manna hefur farið úr skorðum.

Haft er eftir talsmanni Astra Zeneca að það sé hvetjandi að sjá að svipuð ónæmisviðbrögð hafi orðið hjá eldri og yngri fullorðnum og að aukaverkanir hafi verið vægar hjá þeim eldri.

Þess er vænst að bóluefnið, sem heitir AZD1222, verði eitt fyrsta bóluefnið sem verður samþykkt til notkunar ásamt bóluefnum frá Pfizer og BioNTech.