Davinson Sánchez varnarmaður Tottenham hefur upplifað allar hliðar lífsins, hann ólst upp við fátækt og glæpi í Kólumbíu en lifir nú góðu lífi í Lundúnum. Sanchez er 24 ára gamall en tvítugur að aldri gekk hann í raðir Ajax.

Efir eitt tímabil í Hollandi kom Tottenham með tilboð sem var ekki hægt að hafna. „Ég byrjaði sex ára í fótbolta,“ sagði Sanchez upphafið að ferli sínum.

„Þegar ég fór að fara á reglulegar æfingar, þá fór pabbi með mig og það kostaði okkur talsvert. Tveir miðar í strætó, miðarnir kostuðu 300 krónur en þetta var mikill peningur fyrir okkur. Ég vissi að þetta væri mikill peningur fyrir fjölskylduna, þegar ég var tíu ára þá vildi ég fara einn því ég fékk orðið minna nesti. Ég taldi mig geta ferðast einn,“ sagði Sanchez.

Að alast upp við mikla fátækt kenndi Sanchez talsvert en hann sá marga vini sína velja aðra leið í lífinu, hann kallar þá auðveldu leiðina að leiðast út í glæpi þegar fátæktin er mikil.

„Ég sá mikið af mjög slæmum hlutum, eiturlyf og fólk að stela,“ sagði Sanchez um ástandið á hans yngri árum.

„Ég átti vini sem völdu auðveldu leiðina í lífinu, að mínu mati. Þeir eru núna margir komnir í gröfina eða í fangelsi. Þeir voru í slæmum málum. Ég á samt líka vini sem tóku rétta leið eftir skóla og eru í góðum störfum, eru faðir, bræður og synir.“

„Þetta snýst um að velja sér leið í lífinu, ég hafði aldrei áhuga á að velja auðveldu leiðina.“