Hann sagði að aðferðirnar, sem er beitt til að berja niður mótmæli og andstöðu í Hong Kong, geti verið grunnurinn að lausninni á „Taívan vandanum“.
„Ég tel að í framtíðinni verði bara hægt að breyta nafninu úr öryggislög fyrir Hong Kong í öryggislög fyrir Taívan,“
sagði hann. The Guardian skýrir frá þessu.
En til að kínversk stjórnvöld geti sett öryggislög, sem gilda í Taívan, verða þau fyrst að ná stjórn á eyjunni sem hefur verið sjálfstætt ríki síðan kínversku borgarastyrjöldinni lauk 1949. Lengi vel var talið ólíklegt að Kínverjar myndu grípa til hernaðar gegn eyjunni þar sem kínverski herinn hafi einfaldlega ekki getu til þess að kljást við taívanska herinn sem hefur yfir að ráða fullkomnum bandarískum hergögnum. Auk þess myndi alþjóðasamfélagið ekki taka slíkri innrás létt. En nú er staðan breytt og kínverski herinn hefur eflst mjög og bætt tækjabúnað sinn og mun væntanlega haft burði til innrásar innan ekki svo langs tíma.
Oriana Skylar Mastro, hjá Stanford University, sérhæfir sig í kínverskum hernaðar- og öryggismálum. The Guardian segir að hún telji að í fyrsta sinn í sögunni séu Kínverjar við það að geta siglt til Taívan og hertekið eyjuna. Kínverskir sérfræðingar hafa sagt henni að Alþýðuherinn verði líklega í stakk búinn til að ráðast á Taívan eftir eitt til tvö ár. Hún og aðrir bandarískir sérfræðingar telja það þó ekki rétt en telja að sú staða geti komið upp í lok áratugarins.
Ho-fung Hung, prófessor í stjórnmálahagfræði við Johns Hopkins University, telur ekki að árás á Taívan sé yfirvofandi en segir að öryggislögin fyrir Hong Kong hafi sent skýr skilaboð um langtímaáætlanir Kínverja.
„Öryggislögin í Hong Kong eru mjög mikilvæg til að sýna að stjórnvöld í Peking eru reiðubúin til að bjóða alþjóðsamfélaginu birginn. Þetta er aðvörun til Taívan: „Ekki halda að Peking muni ekki grípa til hernaðar. Ekki halda að við óttumst viðbrögð alþjóðasamfélagsins.““
