Ágúst Ólafur Ágústsson, þingmaður Samfylkingarinnar, kom stjórnarandstöðunni til varnar á Facebook í dag, en hún hefur verið sökuð um aðgerðaleysi og að hafa lagt lítið til í viðbrögðum hins opinbera við Covid faraldrinum. Ágúst kallar það „sérkennilega umræðu.“
Heyrst hefur af sérkennilegri umræðu um að stjórnarandstöðuflokkarnir hafi lítið lagt fram þegar kemur að aðgerðum vegna Covid-faraldurins. Sannleikurinn er svo fjarri lagi og hef ég því tekið saman helstu beinhörðu tillögurnar sem við höfum lagt fram á Alþingi. Þetta verður ekki skýrara en við höfum svo sannarlega reynt að leggja okkar af mörkum á tímum neyðarástands þar sem við ættum öll að sitja við borðið og vinna saman.
Ágúst birtir svo í kjölfarið lista af 22 aðgerðum sem stjórnarandstaðan lagði til með einum eða öðrum hætti og hvetur lesendur til þess að kynna sér hverja tillögu fyrir sig „til að sjá hvað var fellt í raun og veru.“
Að lokum spyr Ágúst: „Á þessi ríkisstjórn ekki að hætta þessum gamaldags skotgrafahernaði og baktjaldamakki og fara að hleypa fleirum að borðinu?“
Listinn er hér í heilu lagi eins og Ágúst birtir hann:
1. Auknir fjármunir í nýsköpun, tækni, menningu og skapandi verkefni
2. Auknar álagsgreiðslur til starfsfólks í framlínu faraldursins
3. Hækkun atvinnuleysisbóta (sem eru bara 243 þús eftir skatt)
4. Skilyrða opinbera aðstoð við fyrirtæki sem nýta sér ekki skattaskjól
5. Heimila námsmönnum að fá atvinnuleysisbætur
6. Viðbótarfjárfestingar í vegakerfið og flýting verkefna
7. Auknir fjármunir til framhalds- og háskóla vegna Covid.
8. Aukin hækkun á þaki á endurgreiðslum rannsóknar- og þróunarkostnaðar
9. Lækkun tryggingargjalds fyrir minni fyrirtæki
10. Auknir styrkir til fyrirtækja og einyrkja sem þurftu að loka
11. Aukinn stuðningur við sveitarfélög og heilbrigðisstofnanir vegna Covid
12. Auknar eingreiðslur til öryrkja og eldri borgara
13. Aukinn stuðningur við SÁÁ og fjölgun NPA-samninga
14. Aukinn stuðningur við fjölskyldur langveikra barna vegna Covid
15. Aukinn stuðningur við hjálparsamtök sem sinna auknum matarúthlutunum vegna faraldursins
16. Aukinn stuðningur við kvikmynda- og sjónvarpsgerð
17. Frysting lána hjá ferðaþjónustufyrirtækjum
18. Aukinn stuðningur til fjölmiðla
19. Auknir fjármunir til íþróttafélaga
20. Auknir fjármunir í skógrækt, framkvæmdasjóð ferðmanna og við gerð göngu- og hjólastíga til atvinnusköpunar
21. Aukin grænmetisframleiðsla
22. Þá hefur ítrekað verið kallað eftir átaki í fjölgun starfa (þar með talið opinberra starfa sem annar leiðtogi ríkisstjórnarinnar kallaði „verstu hugmynd allra tíma“). Nú hafa 20.000 störf horfið á þessu á ári og spáð er auknu atvinnuleysi.
