Brynjólfur hefur vakið mikla athygli í íslenska boltanum í sumar fyrir færni sína en einnig fyrir hárgreiðslurnar sínar virðist ætla að mæta til leiks með nýja greiðslu í hvern leik. Í leiknum gegn HK hafði hann látið skrifa „bla bla bla“ í hárið á sér. „Ég veit ekki hverjum nákvæmlega hann var að svara með greiðslunni,“ sagði þáttarstjórnandinn Gummi Ben í þættinum Pepsi Max Stúkan sem sýndur er á Sttöð 2 Sport.
Gummi hrósaði síðan Brynjólfi fyrir að vera heldur betur að reyna í leiknum. „Hann fór ekki í felur. Hann vill fá boltann í hvert einasta skipti og ef það var einhver að fara að jafna þennan leik þá hélt ég að hann myndi gera það eða búa það til.“
Máni Pétursson, spekingur þáttarins og útvarpsmaður, talar síðan um Brynjólf og segir að það deili enginn um það að hann sé karakter. „Þetta er skemmtileg týpa og ég elska þetta með hárið og að vera alltaf tilbúinn að mæta og svara í viðtölum,“ sagði Máni og hélt áfram. „Það er ótrúlega mikið af fólki upptekið af honum, sem segir mér að þessi maður skilur um hvað fótbolti er; „Ég er skemmtikraftur. Ég á að vera hérna fyrir fólkið og hafa gaman af því.“ Fólkið er að lesa viðtölin við Brynjólf, fólk er að borga sig inn og fylgjast með því hvað stendur næst á hárinu á honum. Þessi maður er bara snillingur.“
