Tilraunir með að gefa fólki, sem er smitað af COVID-19, blóðvökva hafa lofað góðu. Þá er blóðvökvi tekin úr fólki, sem hefur náð sér af slíku smiti, og gefin veiku fólki. Dæmi er um að tekist hafi að vinna bug á smiti á einum sólarhring. Það eru sænskir vísindamenn sem standa að tilrauninni.

„Við sjáum að ef þú ert með veiruna í blóðinu þá losnar þú við hana, venjulega næsta dag, ef þú færð blóðvökva með hlutlausum mótefnum.“

Sagði Joakim Dillner, prófessor í smitsjúkdómafræði, í samtali við Sænska ríkisútvarpið.

Aðferðin, að gefa veiku fólki blóðvökva úr fólki sem hefur jafnað sig af sama sjúkdómi, er vel þekkt og margreynd í baráttunni við smitsjúkdóma.

„Þetta hefur verið reynt við aðra smitsjúkdóma en með misjöfnum árangri verður að segjast. Það er ekki öruggt að þetta virki. En í fljótu bragði litið þá er líklegt að þetta virki því mótefni berjast gegn veirum og hægt er að flytja þau á milli fólks. Þess vegna vonum við að hægt sé að hjálpa þeim sem eiga erfitt með að ráða niðurlögum veirunnar.“

Hefur Ekstra Bladet eftir Henrik Ullum, yfirlækni og prófessor hjá blóðbankanum á danska ríkisspítalanum.

Sænska rannsóknin hefur nú farið í gegnum fyrsta og annað stig þar sem tilraunir voru gerðar á 25 sjúklingum. Markmiðið var að tryggja að aðferðin væri hættulaus og að finna út hversu mikinn blóðvökva á að gefa, hvenær og hverjum. Nú verður farið yfir á næsta stig þar sem minnst 100 sjúklingar taka þátt. Þeim verður skipt upp í tvo hópa þar sem annar fær blóðvökva en hinn ekki. Niðurstöðurnar verða síðan bornar saman. Sérfræðingar telja líklegt að nokkrir mánuðir líði þar til tilraunirnar skila niðurstöðu.