Þingmenn og áhrifamenn innan Pírata vinna nú að því að bjarga vefsíðum vefhýsingarfyrirtækisins 1984 sem hrundi í síðustu viku. Margar vefsíðu fóru illa út úr hruninu, þar á meðal vefur Eiríks Jónssonar sem og vefir Pírata og Sjálfstæðisflokksins. Fram kom í twitter-færslu frá 1984 í gær að þingmennirnir Helgi Hrafn Gunnarsson og Smári McCarthy ynnu að því að bjarga því að bjarga verður. Segir Smári á Fésbók að hann hafði hugsað sér að gera eitthvað annað um helgina en að stundum geri plönin sig ekki sjálf:

Ég er búinn að vera að hjálpa til við björgunaraðgerðir hjá 1984, enda góðir vinir mínir sem reka það fyrirtæki og þjónusta þeirra heldur uppi mjög stórum hluta vefsíðna á Íslandi. Þetta er eitt alvarlegasta og skrýtnasta kerfishrun sem ég hef séð. Það er búið að vera helvítis hark að koma þessu upp, en þetta gengur samt alveg ágætlega, og stefnir í að helmingur allrar þjónustu sé komin upp,

segir Smári og bætir við:

Það er samt alveg gífurlega mikið verk eftir, og ég vona að fólk haldi áfram að sýna þessum vinum mínum þolinmæði.

Mörður Ingólfsson framkvæmdastjóri 1984 er áhrifamaður innan Pírata. 1984 hýsir þúsundir vefsíðna og er hluti þeirra kominn aftur í gagnið. Þegar þetta er skrifað liggur vefur Sjálfstæðisflokksins ennþá niðri.