Kynnisferðir/Reykjavik Excursions gáfu út tilkynningu í dag um að Kristján Daníelsson, framkvæmdastjóri fyrirtækisins muni láta af störfum. Kristján hefur stýrt Kynnisferðum í sex ár á tímum þegar ferðamannastraumurinn hefur aukist til muna og umfang félagsins einnig.

Björn Ragnarsson, rekstrarstjóri Hópbifreiða Kynnisferða mun taka við stjórn tímabundið þar til annar framkvæmdarstjóri tekur við.

Áfengi og glæfraakstur

Eins og DV greindi frá skóku ýmis hneykslismál félagið í sumar.

Þann 25. júní birtist myndband af hópferðaökumanni Kynnisferða þar sem hann sést aka mjög glæfralega á Mýrdalssandi. Rútan tekur fram úr bifreið og minnstu munar að hún lendi framan á bifreið sem kemur úr gagnstæðri átt. Báðir ökumenn þurftu að nauðhemla og beygja út í kant.

Sléttum mánuði seinna kom upp mál þar sem pólskur starfsmaður Kynnisferða var sagður smygla áfengi og öðrum munum inn til landsins með nýjum rútum fyrirtækisins. Vitni tjáði DV að hann hefði séð töluvert magn áfengis undir gólfi einnar rútunnar.

Þann 6. ágúst var hópferðabílstjóri Kynnisferða handtekinn við Jökulsárlón. Hann hafði sést drekka áfengi á hóteli við Freysnes í Skaftafelli og þegar lögreglan náði til hans reyndist hann mjög ölvaður.

Versnandi afkoma og uppsagnir

Þann 3. ágúst greindi Morgunblaðið frá því að á annan tug starfsmanna Kynnisferða hafi verið sagt upp störfum. Samkvæmt Kristjáni var ástæðan fyrir uppsögnunum hækkandi launakostnaður og aukin gjaldtaka, til dæmis í flugstöðinni í Keflavík. Þá sé einnig farið að hægja á ferðamannastraumi til landsins.

Kristján sagði að uppsagnirnar væru liður í hagræðingaraðgerðum innan fyrirtækisins og fólki úr öllum deildum hafi verið sagt upp.