Sigmundur Ernir Rúnarsson, þingmaður Samfylkingarinnar, segir að útgerðarfélög á Íslandi hafi fengið um 135 milljarða afslátt af veiðigjöldunum á árunum 2010-2024. Ef veiðigjöld hefðu verið í samræmi við upphaflegt viðmið þá nemi afslátturinn á þessum tíma 365 milljörðum. Þetta kemur fram í pistli Sigmundar sem birtist á Eyjunni í dag.

Sigmundur svarar þar, með sínum eigin hætti, ákalli stjórnarandstöðunnar sem hefur krafist útreikninga sem sýni hvaða áhrif fyrirhuguð hækkun veiðigjalda muni hafa á sjósækjendur og sjávarbyggðir. Sigmundur birtir því útreikning til að sýna hvaða áhrif veittur afsláttur veiðigjalda hefur haft á ríkissjóð.

„Það er raunar hægt að reikna dæmið á marga vegu. En hefði 33ja prósenta rentureglan verið efnd að fullu, sem er hlutur þjóðarinnar í auðlindinni, ætti þjóðin inni hjá útgerðinni um 135 milljarða króna frá því auðlindarentan fór að myndast fyrir röskum hálfum öðrum áratug. Þetta er tekjutap ríkisins fyrir það að leggja á of lágt veiðigjald, í öllu falli langt undir þeirri rentu sem lögin gera ráð fyrir.

Greidd veiðigjöld útgerðarinnar frá 2010 til 2020 námu að meðaltali 7 milljörðum á ári. Þau hefðu átt að vera 16 milljarðar á ári, að meðaltali, ef þjóðin hefði fengið gjöld sín greidd að fullu. Mismunurinn er 9 milljarðar á ári á ellefu ára tímabili, eða samtals 99 milljarðar króna. Ef sá mismunur er yfirfærður á árin 2021 til 2024, fæst samtalan 135 milljarðar, sem útgerðin fékk í afslátt af lögboðnum gjöldum á umræddum tíma.“

Sigmundur minnir á að fyrst hafi staðið til að miða renturegluna við 65 prósent. Þá hefðu veiðigjöld numið um 30 milljörðum á ári síðustu 15 ár, í stað 7 milljarða. Þar með hefði afslátturinn til útgerðarinnar numið 354 milljörðum á þessum tíma, en þeim pening hefði mátt verja í að til dæmis viðhalda og leggja vegi.

„Það er svo að vonum, að stjórnarandstöðuþingmenn á Alþingi, sem gráta í pontu yfir píningu ríkustu greifa landsins þessi dægrin, þakki mér fyrir innsenda umsögn. Eftir nógu mörgum útreikningum hafa þeir kallað. Því af tölunum skulið þið þekkja þá.“