Þóra Kristín gerir mál hins 17 ára Oscars Anders Bocanegra Florez að umtalsefni á Facebook-síðu sinni og þá ákvörðun Víðis Reynissonar, formanns allsherjar- og menntamálanefndar, að fara fram á frestun brottvísunar hans.
Hefur Víðir meðal annars verið sakaður um að rjúfa trúnað og fara fram í umboðsleysi. Morgunblaðið fjallar til dæmis ítarlega um málið í dag undir fyrirsögninni Uppnám í allsherjarnefnd vegna Víðis.
Þóra Kristín segir í færslu sinni að þingmenn valdaflokksins séu ekki í karakter í núverandi hlutverki, þeir gargi og gagnrýni allt laust og fast, alltaf jafn reiðir og hneykslaðir sama hvert tilefnið er.
„Nú er það framganga Víðis sem kvelur þau, hann vildi ekki horfa þegjandi upp á að 17 ára unglingur, sem býr hér í skjóli fósturforeldra sem taka ábyrgð á honum, yrði dreginn fram úr rúmi sínu og fluttur nauðungarflutningi á götuna í Kólumbíu, meðan einungis eru nokkrir dagar þar til Alþingi tekur afstöðu til þess hvort hann fær ríkisborgararétt á Íslandi.“
Þóra segir að það eina sem Víðir gerði hafi verið að vekja athygli á því að það gæti borgað sig að bíða eftir niðurstöðu áður en lögregla hæfist handa við brottflutning.
„Þingmenn flokksins liggja á hundaflautunni og krefjast þess að fá höfuð Víðis á fati og að framtíð þessa unglings verði lögð í rúst, þeir eru skjálfandi af heift og bræði. En uppnámið er í grunninn vegna þess, að þau telja að valdarán hafi verið framið í landinu. Það sé hérna vinsæl ríkisstjórn, án þess að þau og sérhagsmunir skjólstæðinga þeirra eigi nokkra aðkomu að henni.“
Þóra Kristín er ómyrk í máli í garð Sjálfstæðisflokks.
„Þau eru ekki í karakter í minnihluta, kunna ekki að reka málefnalega og einarða stjórnarandstöðu og vera ósammála án þess að saka viðmælandann í sífellu um lögbrot og heimta refsingar. Þau eru búin að klæða sig uppá í völdin og forréttindin. Án þeirra eru þau berrössuð. Þau eru varla hættuleg, frekar gráthlægileg og stundum alveg óbærilega leiðinleg.“
