Ný og stórhættuleg aðferð sem á að lækna svefnleysi hefur notið vinsælda í Kína. Með aðferðinni eru sjúklingarnir „hengdir“ og látnir sveiflast í nokkrar mínútur. Varað hefur verið við aðferðinni og hún sögð lífshættuleg.
Greint er frá þessu í breska blaðinu The Daily Mail.
Aðferðin var þróuð af manni sem kallast Sun Rongchun frá borginni Shenyang í norðausturhluta Kína. Segir hann að aðferðin lækni svefnleysi.
Í henni er eins konar beisli fest utan um háls og kjálka sjúklingsins. Er honum sveiflað hangandi fram og aftur í nokkrar mínútur á milli tveggja staura.
Í einu myndbandinu sést Sun Rongchun sjálfur nota aðferðina. En hann hefur þjáðst af meiðslum í hrygg (cervival spondylosis). Það er að beinin í hryggnum hafa eyðst sem veldur honum meðal annars svefnleysi.
Með þessari stórskrýtnu aðferð fann Rongchun leið til þess að létta þrýstingi af hryggnum og þar með minnka sársaukann.
„Þeir sem hafa prófað þetta segja að svefninn hafi batnað til muna,“ segir í færslu á samfélagsmiðlum með myndbandi sem 11 milljón manns hafa horft á.
Í athugasemdum er fólk mishrifið af aðferðinni og ekki allir sannfærðir um að þetta virki. Einnig telja sumir að þetta muni virka „of vel“. „Þetta er aðferð til að sofa að eilífu,“ segir einn í athugasemdum.
Þá hafa læknar varað við þessari aðferð og bent á að það sé ekki stutt neinum vísindalegum gögnum að þetta virki gegn svefnleysi. Einnig er bent á að þetta sé beinlínis stórhættulegt og geti valdið dauða.
Sá partur hryggsins sem myndar hálsinn er ekki gerður til þess að halda uppi fullri líkamsþyngd manneskju í beisli. Með þessu skapast hætta á að mænan geti skaðast sem getur valdið lömum eða alvarlegum taugaskaða. Einnig geta slagæðar sem liggja upp í höfuð skemmst sem getur valdið heilablóðfalli.
Þá hafa borist fréttir af því í Kína að fólk hafi látist eftir að hafa prófað þessa aðferð. Meðal annars maður í borginni Chongqing sem festi sig með beisli af trjágrein á síðasta ári.
Svefnleysi er frekar algengur kvilli sem hrjáir um tíunda hvern Breta eins og kemur fram í frétt Daily Mail. Skilgreiningin á svefnleysi er sú að einstaklingur eigi erfitt með svefn í að minnsta kosti þrjár nætur í viku í meira en þrjá mánuði.
Erfitt getur reynst að meðhöndla svefnleysi og eru læknar oft tregir til þess að skrifa upp á svefnlyf fyrir sjúklinga. Er það vegna þess að sjúklingar byggja upp þol gegn þeim og þá hefur verið talið að notkun lyfjanna geti aukið hættuna á heilabilun og skertri einbeitingu sem sé einstaklega hættulegt í umferðinni.
