Atvinnuleysi mældist 4.8 prósent í janúar og hefur aukist hratt síðustu mánuði. Mældist atvinnuleysi 3.6 prósent í fyrra. Gera má ráð fyrir að hátt í 10 þúsund manns séu án atvinnu.

Starfandi forstjóri Vinnumálastofnunar, Unnur Sverrisdóttir, segir við Fréttablaðið í dag að gert hafi verið ráð fyrir aukningu, en tölur hafi þó farið fram úr spám í janúar.

Búist er við að atvinnuleysi aukist enn frekar í febrúar, en dragi síðan saman og verði um fjögur prósent í sumar, áður en það eykst aftur í haust, en talið er að atvinnuleysi verði um 4.5 prósent að meðaltali á árinu, sem er það hæsta síðan 2011.

Í hverjum mánuði eru greiddir úr um 2.4 milljarðar í atvinnuleysisbætur, og er gert ráð fyrir um 26 milljörðum í heildargreiðslur fyrir árið 2020.

Erlendir ríkisborgarar telja um 40% atvinnulausra, eða 3.800 manns, en þar af eru 2.200 Pólverjar.

Árin fyrir hrun, 1991 – 2007, mældist atvinnuleysi hér á landi 3.3% að meðaltali. Árið 2010 fór það hæst upp í 9.3% þegar rúmlega 15 þúsund manns voru án atvinnu.

Síðsumars árið 2017 var atvinnuleysi komið niður í eitt prósent, þegar um 2000 manns voru án atvinnu, en hefur það síðan aukist í tæp fimm prósent.