Jude Bellingham, er nafn sem fáir þekkja enda er hann aðeins 16 ára gamall. Bellingham spilar fyrir Birmingham í næst efstu deild Englands. Hann er nú eftirsóttur af öllum stórliðum Evrópu.
Bellingham er frá Englandi en Manchester United, FC Bayern, Borussia Dortmund, Barcelona og Real Madrid eru öll að skoða hann, ásamt fleiri liðum. Hann hefur spilað 31 leik fyrir Birmingham á þessu tímabili, öflugt fyrir 16 ára dreng.
Þar sem Bellingham er aðeins 16 ára gamall þá er hann á skólasamningi, hann þénar aðeins 145 pund á viku í dag. Um 20 þúsund krónur.
Bellingham verður 17 ára í júní og fer þá frá Birmingham, með öll stórlið Evrópu á eftir sér telja ensk götublöð að laun hans hækki hressilega. Því er spáð að Bellingham verði boðinn samningur, sem gefi honum 100 þúsund pund á viku í vasann. Það eru rúmar 16 milljónir íslenskra króna. Ágætis launahækkun sem bíður hans.
Bellingham hefur spilað mest á miðsvæðinu en einnig sem fremsti maður, honum er líkt við Dele Alli miðjumann Tottenham.
Manchester United reyndi að kaupa Bellingham í janúar en félög reyna nú að semja við Birmingham um kaupverð áður en glugginn opnar, í sumar.