Rokktónleikar í Silfurbergi
Jaðarrokksveitin Dinosaur jr. hélt nýverið tónleika í Silfurbergi í Hörpu. Hljómsveitin er kannski ekki vel þekkt hér heima, en aðdáendur hennar létu sig ekki vanta og sveif nostalgían yfir indietónlistinni sem sveitin hóf að spila á níunda áratugnum.
Dinosaur jr. var stofnuð árið 1984 af þeim J Mascis gítarleikara, Lou Barlow bassaleikara og Murph trommara og tóku þeir upp þrjár plötur áður en mannabreytingar urðu á síðustu öld. Árið 2005 komu upprunalegir meðlimir aftur saman og hafa þeir gefið út fjórar plötur eftir sameininguna. Alls hefur Dinosaur jr. gefið út ellefu plötur og kom sú nýjasta, Give a Glimpse of What Yer Not, út árið 2016. Platan innihélt talsvert af nýju efni og hlaut mikið lof gagnrýnenda og aðdáenda sveitarinnar.
Oyama sá um upphitun, en sveitin spilar jaðarrokk í anda tíunda áratugarins og sækir mikinn innblástur í Dinosaur Jr. Sveitin gaf plötuna Coolboy út árið 2014 við góðar undirtektir og Síðastliðið vor kom smáskífan Handsome Devil út. Oyama vinnur nú að efni fyrir næstu plötu.
