Lengri meðaldvalartími erlendra ferðamanna hér á landi og tilfærsla á eftirspurn frá Airbnb og sambærilegri gistingu í átt til hótela eru meðal helstu orsaka þess að gistinóttum á hótelum hefur fækkað mun minna en komum erlendra ferðamanna það sem af er ári, samkvæmt Korni Íslandsbanka. Á Norður- og Austurlandi hefur gistinóttum fjölgað í ár, sem er sögð endurspegla kærkomna þróun í átt til jafnari dreifingar ferðamanna um landið. Þrátt fyrir talsverða fjölgun hótelrýma er nýtingarhlutfall íslenskra hótela enn vel ásættanlegt í alþjóðlegu tilliti.
Það sem af er ári hefur gistinóttum á hótelum fækkað um tæplega 2% en áætluðum gistinóttum í gegn um Airbnb og svipaðar vefsíður hefur hins vegar fækkað um nærri 10%. Virðist því sem hlutfallslega stór hluti fækkunar ferðamanna endurspeglist í minni Airbnb-gistingu. Ástæður þessa eru væntanlega bæði breytt samsetning ferðamanna, þar sem þeim ferðamönnum sem eru sparastir á ferðakostnað hefur fækkað meira en hinum, en einnig hertur reglurammi og meiri eftirfylgni við reglur um Airbnb gistingu.
Í Korni Íslandsbanka er einnig nefnt að talsvert hafi verið fjallað um öra uppbyggingu hótelrýma og hvort hætta sé á offramboði hótelgistingar á komandi misserum:
„Er til að mynda bent á þetta sem áhættuþátt í nýlega birtum Fjármálastöðugleika Seðlabankans. Enn sem komið er virðist þó nýting íslenskra hótela vera vel ásættanleg. Þannig var herbergjanýting í hérlendum hótelum 74% í september sl., sem er lækkun um ríflega 4 prósentustig frá sama mánuði í fyrra. Framboð gistirýmis hefur hins vegar aukist um ríflega 6% á sama tíma. Frá áramótum nemur hótelnýtingin að jafnaði 66% samanborið við ríflega 70% á fyrstu níu mánuðum síðasta árs. Í alþjóðlegum samanburði þykir 66% nýting allmyndarleg þótt á móti megi benda á að hár launakostnaður setur þrýsting á að ná betri nýtingu hérlendis en gengur og gerist víða erlendis.“
