„Einfalda framkvæmd samkeppnislaganna og auka skilvirkni“ hljómar einhvern veginn betur en „Láta blauta drauma fákeppnismógúla rætast með því að draga tennurnar úr samkeppniseftirliti á Íslandi eins og frekast er unnt“
skrifar Gylfi Magnússon, dósent í viðskiptafræði og fyrrverandi efnahags- og viðskiptaráðherra um nýtt frumvarp Þórdísar Kolbrúnar Gylfadóttur, sem er sagt eiga að einfalda samkeppnislögin. Í því felst að heimild Samkeppniseftirlitsins til að skjóta úrskurðum áfrýjunarnefndar samkeppnismála til dómstóla verði afnumin. Þessi heimild hefur verið gagnrýnd af fulltrúum atvinnulífsins og tekur Gylfi undir þá gagnrýni:
„Nú á að koma í veg fyrir að Samkeppniseftirlitið geti borið niðurstöður áfrýjunarnefndar undir dómstóla og gætt þannig m.a. hagsmuna brotaþola. Jafnframt á að koma í veg fyrir að eftirlitið geti þvingað fram breytingar á skipulagi fyrirtækja þegar ekkert annað virðist duga til að ná fram eðlilegri samkeppni,“
segir Gylfi og bætir við:
„Þetta eru ekki ný baráttumál mógúlanna, hugmyndir í þessa veru hafa oft verið viðraðar áður en ekki fengið brautargengi vegna harðrar andstöðu. Nú sjá þeir hins vegar greinilega lag til að knýja þetta fram.“
Fyrirtækjum verður sjálfum heimilað að meta hvort skilyrði til að eiga í samstarfi sé fyrir hendi en slíkt hefur verið gert víða í Evrópu. Þetta er sagt gert til að auka skilvirkni og hagræði.
Ef frumvarpið verður að lögum verður heimild Samkeppniseftirlitsins til íhlutunar í starfsemi fyrirtækja, án þess að þau hafi gerst brotleg við samkeppnislög, felld niður. Einnig verða veltumörk tilkynningarskyldra samruna hækkuð nokkuð frá því sem nú er en mörkin hafa verið óbreytt frá 2008.
Einnig kveður nýja frumvarpið á um að forstjóri Samkeppniseftirlitsins verði framvegis ráðinn af stjórn þess til fimm ára í senn og að sami einstaklingurinn megi aðeins gegna starfinu í tvö fimm ára tímabil. Núverandi lög kveða á um að forstjórinn sé ráðinn ótímabundið af stjórn eftirlitsins.
