Stefán Karl Stefánsson leikari greinir frá því á Facebook að hann þurfi að leggjast inn á spítala í nokkra daga. „Jæja, aftur á spítalanum í nokkra daga smá bakslag en ekkert alvarlegt, en svo bara heim aftur. Svona er lífið, tvö skref áfram og svo eitt aftur á bak, á endanum kemst maður á leiðarenda,“ skrifar Stefán Karl.

Eiginkona Stefáns Karls, Steinunn Ólína Þorsteinsdóttir, greindi frá því fyrir viku að sjúkdómur hans væri langt genginn, eða á fjórða stigi, og því lífslíkur hans verulega skertar. Hann greindist með gallgangnakrabbamein í fyrrahaust.

„Meinvörp þessa sjúkdóms er stundum hægt að fjarlægja með skurðaðgerðum eins og í aðgerðinni sem Stefán fór í gegnum fyrir hálfum mánuði en óvíst er að hann þyldi fleiri slíkar þegar sjúkdómurinn lætur aftur á sér kræla eða að það verði hreinlega gerlegt vegna staðsetningar meinvarpa. Um þetta er lítið hægt að spá á þessari stundu. Við vonum það besta,“ sagði Steinunn Ólína þá.

Hún minnti á að þrátt fyrir þessar sorgar fregnir væri mikilvægt að njóta lífsins. „Þrátt fyrir að líkurnar og tölfræðin séu okkur ekki í hag og kerti Stefáns brenni hratt þá ætlum við ekki að dvelja við það og verða örkumla af hræðslu. Við vitum að tíminn er dýrmætur sem aldrei fyrr og höfum einsett okkur að njóta hans eins vel og okkur gefst kostur á. Dauðinn er nauðaómerkilegur – lífið er hinsvegar ekkert minna en stórkostlegt!,“ sagði Steinunn Ólína.