„Já, til er fólk sem ætlar sér í röð í Costco á morgun. Það er nákvæmlega ekkert að því. Sumir eru spenntir fyrir opnun verslunarinnar, aðrir þurfa kannski á því að halda að kaupa inn á góðum kjörum,“ segir Kjartan Atli Kjartansson fjölmiðlamaður og körfuknattleiksþjálfari í stuttri hugvekju á Facebook.

Mikil eftirvænting ríkir vegna opnunar Costco. Þar verður hægt að gera góð kaup og hefur verslunarrisinn þegar boðið langbesta verð á olíu hér á landi, verð sem olíufélögin íslensku treysta sér ekki til að keppa við. Hjálparsveit skáta í Garðabæ ætlar að stýra umferð á svæðinu. Þá ætlar Vísir að vera með beina útsendingu frá verslunarmiðstöðinni klukkan 08:30 í fyrramálið þar sem búist er við að þúsundir Íslendinga nýti sér opnunartilboð.

Nokkuð hefur verið um það á samfélagsmiðlum að gert sé grín að þeim sem ætli að mæta í röð í fyrramálið fyrir utan Costco til aðreyna næla sér í vörur á góðu verði. Um þá fjallar Kjartan Atli á Facebook-síðu sinni. Hann segir:

„Einnig eru til vitringar á Facebook, sem eru svo yfir það hafnir að bíða í röð að þeir þurfa að gera lítið úr samborgurum sínum. Vitringar, sem vilja láta vita að þeir eru betri en þeir sem vilja/þurfa bíða í röð.“

Kjartan heldur áfram að segja þeim til syndana og bætir við að lokum:

„En þessir vitringar yrðu líklega ósáttir ef börnin þeirra kæmu heim úr skólanum, eftir að hafa verið lítillækkuð fyrir það eitt að bíða í röð í kaffiteríunni. Svona getur fólk stundum verið blint á eigin gjörðir.“