Illugi Gunnarsson, níu ára gamall sonur Katrínar Jakobsdóttur formanns Vinstri grænna, hefur verið skipaður stjórnarformaður Byggðastofnunar. Í það minnsta barst Illuga bréf þess efnir á heimili sitt í Vesturbæ Reykjavíkur. Þó má gera ráð fyrir að eilítil mistök hafi þarna átt sér stað og alnafni hans, ráðherrann fyrrverandi, hafi átt að fá bréfið.

Faðir Illuga yngri, Gunnar Sigvaldason, greinir frá þessari spaugilegu bréfasendingu á Facebook-síðu sinni. „Stundum færir pósturinn manni eintóm gleðitíðindi. Rétt í þessu fékk ég þær fréttir að sonur minn yrði stjórnarformaður Byggðastofnunar. Við fjölskyldan erum svo stolt!“ skrifar Gunnar og birtir þessu til vitnis umrætt bréf þar sem nafn og heimilisfanga sonar hans er kyrfilega tiltekið. Undir bréfið skrifar Ragnhildur Hjaltadóttir ráðuneytisstjóri, fyrir hönd samgöngu- og sveitarstjórnarráðherra.