Áhorf á Eurovision-söngvakeppnina var með ágætum en alls horfðu 182 milljónir á þrjár beinar útsendingar frá keppninni; undankeppnirnar tvær og svo úrslitakvöldið þann 13. maí síðastliðinn.
Í frétt ESCToday kemur fram að Íslendingar hafi horft hlutfallslega mest á keppnina. Þrátt fyrir að Paper, lag Svölu Björgvinsdóttur, hafi ekki komist í úrslit horfðu 98 prósent sjónvarpsáhorfenda á keppnina.
Áhorf á keppnina minnkaði þó milli ára og er það rakið til þess að Rússar ákváðu að draga sig úr keppninni. Áhorf á netinu jókst þó umtalsvert og tvöfaldaðist raunar frá keppninni árið 2016. Alls horfðu sex milljónir manna á beinar útsendingar frá keppninni á YouTube.
Athygli vekur að 1,4 milljónir manna í Portúgal horfði á keppnina, en það jafngildir því að tæpleag þriðjungur sjónvarpáhorfenda hafi horft á keppnina þar í landi. Eins og margir vita fór Portúgal með sigur úr bítum í keppninni.
