„Það kom fyrir að ég skaut menn í lærið með saltskoti ef þeir borguðu ekki.“

Þetta segir maður með fortíð úr undirheimum Reykjavíkur, sem vildi ekki láta nafns síns getið, og gegndi störfum handrukkara um töluvert skeið. Í samtali við Mannlíf segist hann hafa sífellt gengið með skammbyssu í hanskahólfinu. Einnig segist hann hafa verið með afsagaða haglabyssu þegar hann rukkaði „erfiða“ einstaklinga. „Þá var maður búinn að fjarlægja öll höglin úr skotunum og fylla þau með grófu salti,“ segir fyrrum handrukkarinn.

Maðurinn segist hafa notað skammbyssur mest til að skjóta í áttina að fólki, einnig mikið á bíla en þá úr slíkri fjarlægð að minni hætta var á mannskaða. „Við vorum fyrst og fremst með þetta til að skapa ógn,“ segir hann. „Ég var sem betur fer ekki alveg það „farinn“ að ég notaði skammbyssuna á fólk.“

Umræddur maður segist ekki þekkja til þess hvort skotvopnaburður hafi aukist á undanförnum árum en á því tímabili þar sem hann gegndi sínum störfum voru þær afar algengar.