Sjónvarpskokkarnir John Torode og Gregg Wallace eru ekki sammála um hvort þeir séu vinir. Þeir hafa verið samstarfsmenn í 12 ár í bresku þáttunum MasterChef og því mætti ætla að traust vinátta ríkti á milli þeirra en svo er þó ekki, allavega að sögn annars þeirra. Torode upplýsti á dögunum að þeir hafi aldrei heimsótt hvor annan. „Við höfum aldrei verið vinir,“ sagði hann og bætti við að þeim hefði nokkrum sinnum lent illilega saman við upptökur.

Wallace lítur samband þeirra allt öðrum augum. Hann sagði í nýlegu viðtali að samband þeirra væri mjög náið og þeir treystu hvor öðrum. Torode var svaramaður Wallace þegar hann gekk í hjónaband í fjórða sinn á síðasta ári. „Fólk gerir sér ekki grein fyrir því hversu nánir við erum – hann var svaramaður minn, við vinnum náið saman sjö til átta mánuði á ári. Það sem er svo frábært við samstarfið er að ef annar okkar er niðurdreginn þá er það hinn sem hressir hann við,“ sagði Wallace. Hann sagði frá því að þegar hann tók þátt í danskeppninni Strictly Come Dancing árið 2014 hefði honum liðið illa og hringt í Torode til að segja honum frá líðan sinni. Torode mun hafa hughreyst hann.

Félögunum ber því ekki saman um hvort þeir séu vinir eða ekki. Hvað um það, þeir virka allavega vel saman á skjánum.