Brynjar Níelsson þingmaður Sjálfstæðisflokksins er lítt hrifin af Smartlandinu á mbl.is og þær fréttir sem birst hafa um hann á vefsvæðinu undanfarið. Gengur Brynjar jafnvel svo langt að saka Mörtu Maríu, umsjónarmanns Smartlandsins um einelti.
Í grein Smartlands á dögunum var sagt frá því að Brynjar hefði farið í heilsufarsmælingu í líkamsræktarstöðinni Hreyfingu en mælingin var Brynjari ekki beinlínis hagstæð. Notast var við svokallað Boditrax-tæki.
„Boditrax-tækið segir að heilsufarið sé eins og hjá 70 ára manni, en Brynjar er ekki nema 56 ára,“ segir í grein Smartlands og þá kemur fram á öðrum stað.
„Brynjar þarf þó ekki að örvænta því með því að byrja að hreyfa sig og taka aðeins til í mataræði sínu getur heilmikið gerst.“
Eitthvað virðast ummæli smartlands hafa farið fyrir brjóstið á Brynjari sem ritar í færslu á facebooksíðu sinni:
„Ég sæti einelti af hálfu Smartlands. Þar er haldið fram að ég búi í 70 ára gömlum líkama og vitnað í ónýta tölvu.“
Brynjar skilur heldur ekki hvers vegna fagrir lokkar hans eru ekki gerðir að umfjöllunarefni á Smartlandinu.
„Svo kemst ég ekki á lista stjórnmálamanna með fallegasta hárið, sem er með miklum ólíkindum.“
Þá spyr Brynjar hvort Smartland hyggist jafnvel ganga svo langt að sniðganga hann þegar kemur að því að velja kynþokkafyllstu stjórnmálamenn landsins.„ Þá verða þau fullkomlega ómarktæk.“
