Stjarnan tapaði sínum fyrsta deildarleik í sumar í kvöld er liðið spilaði gegn KA á teppinu í Garðabæ.

KA kom sá og sigraði á Samsung vellinum en þeir Ólafur Aron Pétursson og Elfar Árni Aðalsteinsson gerðu mörkin í 2-0 sigri.

Hér má sjá það góða og slæma úr leiknum.

Plús:

Magnaður og mikilvægur sigur fyrir KA-menn. Bæði mörk liðsins voru góð og sérstaklega það seinna sem kom eftir virkilega laglegt spil.

Stríðsmennirnir í vörn KA voru líka frábærir. Það var flestu lúðrað burt þegar alvöru hætta var að skapast.

KA-menn voru slakir í fyrri hálfleik en Óli Stefán hefur hjólað í sína menn í hálfleik. Allt annað lið mætti til leiks í þeim síðari.

Þriggja miðvarðakerfi KA virkaði virkilega vel í leiknum í dag. Meiri agi og ró í liðinu en oft áður.

Mínus:

Á ég von á Auðunni Blöndal? Flottur sigur hjá KA og allt það en það er bara ótrúlegt að Stjarnan hafi ekki skorað í þessum leik. Ný sería af ‘Tekinn’ gæti verið á leiðinni.

Þrátt fyrir fjölmörg færi þá tókst Stjörnumönnum ekki að skora. Síðustu tíu mínúturnar voru mikið ‘panic’, það má ekki.

Lið sem ætlar sér titilinn tapar ekki heima 2-0 gegn KA. Þetta hefur ekki góð áhrif á þá bláklæddu.

Rúnar Páll, þjálfari Stjörnunnar, ákvað að hlaða í þriggja manna skiptingu á 65. mínútu leiksins. Það er ansi athyglisvert og skilaði litlu.