Ítalska knattspyrnusambandið hefur staðfest það að liði Cagliari verði ekki refsað fyrir hegðun stuðningsmanna fyrr á leiktíðinni.

Ungstirnið Moise Kean varð fyrir kynþáttafordómum í apríl er Juventus spilaði við Cagliari. Hann er aðeins 19 ára gamall.

Málið varð risastórt á Ítalíu og var kallað eftir því að sambandið myndi refsa Cagliari harkalega eftir áreiti í garð bæði Kean og Blaise Matuidi.

Kean varð fyrir áreiti í leiknum og fagnaði svo fyrir framan stuðningsmenn heimaliðsins og ögraði þeim verulega.

Fleiri leikmenn hafa orðið fyrir kynþáttafordómum á Ítalíu síðustu ár og má nefna Mario Balotelli, Kalidou Koulibaly og Kevin-Prince Boateng.

Sambandið telur að áreiti stuðningsmanna Cagliari hafi haft takmörkuð áhrif á leikinn og verður félaginu ekki refsað.