Íþróttafréttamaðurinn Ríkharð Óskar Guðnason, betur þekktur sem Rikki G, sló á létta strengi eftir innslag í kvöldfréttum Stöðvar 2 sem vakti athygli á sunnudagskvöld. Þar komu Rikki og körfuboltamaðurinn Fannar Ólafsson í beinni útsendingu inn í íþróttafréttirnar til að ræða leik Grindavíkur og Þórs frá Þorlákshöfn í úrslitakeppni Domino’s deildarinnar í körfubolta.

Mikill hæðarmunur er á þeim félögum enda Fannar um 205 sentimetrar á hæð en Rikki nær því að vera meðalmaður í þeirri deild. Eftir lauflétt spaug á Twitter um hæðarmuninn birti Rikki meðfylgjandi mynd með eftirfarandi yfirlýsingu um að þeir myndu ekki feta í fótspor Arnolds Schwarzenegger og Dannys DeVito:

„Ég vil koma eftirfarandi á framfæri. Ég og Fannar Ólafs höfum hafnað hlutverkinu í Twins 2! Takk.“