„Stuðlag er málið í ár segir Evrópa, nánast öll lönd búin að velja sér ballöður í ár og stuðlögin eru þau einu sem munu standa upp úr segja sérfræðingarnir úti,“ segir Þórunn Erna Clausen á Facebook um lagið sem talið er sigurstranglegast í ár. Margir halda því fram að búið sé að finna sigurvegarann og nú sé aðeins spurning hverjir raða sér í næstu sæti.
En hver er það sem er að fara sigra keppnina. Söngvarinn heitir Francesco Gabbani og keppir fyrir hönd Ítala. Lagið heitir Occidentali’s Karma og hefur vakið gríðarlega athygli á Youtube en tugir milljóna hafa horft á myndbandið.
Texti lagsins þykir einnig velheppnaður, þar er ort um ást og sorg en einnig vitnað í heimspeki og vísindi. Strax í byrjun lagsins er vitnað í sjálfan Shakespeare og heimspekinginn Erich Fromm og orð Hamlets danaprins: „Að vera eða ekki vera.“
Þá minnist hann á AA samtökin, og í viðlaginu má finna tilvísanir í buddisma. Í Metro er vitnað í aðdáendur sem hafa krufið textann: En hvað þýðir „panta rhei?“ eða allt flæðir? Vilja sérfræðingarnir tengja það við gríska heimspekinginn Herakleitos sem var einn af forverum Sókratesar. Hugmyndir hans voru helst tvær ef vitnað er í Wikipedia og hafa haft töluverð áhrif.
„Annarsvegar kenning hans um einingu andstæðna (vegurinn upp og vegurinn niður er einn og hinn sami) og að átök milli andstæðna orsaki sífelldar breytingar. Hinsvegar kenningin um að allt sé hverfullt. Síðari hugmyndin er merkileg að því leytinu til að menn höfðu verið gjarnir á að trúa á eitthvað sem væri eilíft fram til þessa.“
[youtube https://www.youtube.com/watch?v=-OnRxfhbHB4&w=660&h=415]
