Sóknin er nýr hlaðvarpsþáttur á 433.is, eftir hverja einustu umferð í Pepsi Max-deild karla í sumar, þá munum við gera hlutina upp.

Við fáum góða gesti til okkar en að þessu sinni var það Bjarni Helgason, blaðamaður á Morgunblaðinu.

Það gæti verið viðkvæmt mál að ræða Portúgalann Pedro Hipolito sem tók við ÍBV fyrir leiktíðina en hann var áður hjá Fram.

ÍBV byrjaði sumarið á 3-0 tapi heima gegn Fylki og steinlá svo gegn KR með sömu markatölu í síðustu umferð.

Hörður Snævar Jónsson, ritstjóri 433.is, þekkir vel til Eyja og er ekki hrifinn af byrjun liðsins sem hefur ekki verið sannfærandi.

,,Pedro Hipolito tekur við í haust og það voru einhverjir Framarar búnir að segja mér að hann væri drullu góður þjálfari.“

,,Hann er ekki að heilla með svörum sínum eftir leiki. Þegar ég var að punkta fyrir þetta þá skrifaði ég bara ‘Pedro the liar’. Hann reynir að ljúga að fólki að þetta sé mjög gott.“

,,Ég sá ekki þennan Fylkisleik en þar voru þeir víst frábærir en töpuðu samt 3-0. Hann talaði um að ÍBV hefði stjórnað leiknum gegn KR en þeir gerðu það aldrei. Ég var á vellinum.“

Bjarni segir svo sína hlið en Pedro hefur verið á Íslandi í tæp tvö ár eftir að hafa tekið við Fram og var árangurinn í besta falli ágætur þar á bæ.

Bjarni segir að Pedro hafi í raun verið óskrifað blað þegar hann kom til landsins en ráðning Fram vakti verðskuldaða athygli.

,,Þetta ÍBV lið, maður veit ekki alveg hvað maður á að segja. Maður vorkennir svolítið Eyjamönnum,“ sagði Bjarni.

,,Þessi gæi var bara alveg óskrifað blað þegar hann kom til Íslands. Hann tekur við Fram og það eina sem var sagt er að þessi gæi hafi unnið með Rui Faria [aðstoðarmanni Jose Mourinho] og fengið meðmæli.“

,,Í fyrra setur hann svo fjölmiðlamenn í bann. Bannar leikmönnum að koma í viðtal eftir leik, íslenskir fjölmiðlar hafa alveg verið settir í bann en þá hefur það verið fyrir eitthvað annað en tapleik. Sérstaklega þegar umfjöllunin hefur ekki verið nein.“

,,Þá hugsaði maður með sér að þessi gaur væri mjög sérstakur. Ég held að hann fái ekki að klára þetta tímabil í Eyjum. Hann er að biðja um það með hvernig hann kemur fyrir í þessum viðtölum.“