Söngvarinn Tony Bennett er orðinn níræður. Í lok síðasta árs sendi hann frá sér endurminningabókina Just Getting Started. Söngvarinn var nýlega í viðtali við Sunday Times ásamt eiginkonu sinni, Susan Benedetto, sem er fjörtíu árum yngri en hann. Þar sögðu þau frá kynnum sínum en þau hittust fyrst þegar Susan var 13 ára og formaður aðdáendaklúbbs hans. Foreldrar hennar voru miklir aðdáendur söngvarans og þegar móðir Susan var ólétt að Susan, komin þrjá mánuði á leið, fengu hjónin mynd af sér með Bennett baksviðs eftir tónleika hans. Myndin er enn til og Bennett hefur áritað hana.

Þegar Susan var 19 ára hafði hún samband við Bennett sem bauð henni út. Hún segist ekki hafa haft áhuga á karlmönnum sem voru á hennar aldri, hún var gagntekinn af söngvaranum. „Ég var heilluð af útliti hans, tali hans og því hversu vel hann kom fram við mig. Hann var fullkominn herramaður,“ segir hún. Hún varð þriðja eiginkona hans árið 2007 og þá höfðu þau verið saman í tuttugu og eitt ár.

Hjónin búa á Manhattan. Bennett er frístundamálari og málar með útsýni yfir Central Park. Susan hefur setið fyrir hjá honum. Að sögn eiginkonunnar syngur Bennett öllum stundum, og vitanlega hraustlega í sturtunni.